တစ်နှစ်ပြည့်မြောက် မွန်အမျိုးသားဒီမိုကရေစီအဖွဲ့ (လွတ်မြောက်နယ်မြေ) ထုတ်ပြန်ကြေငြာချက်
                                                                                            ရက်စွဲ ။ ၂၈၊ ၉၊ ၂၀၀၉

ယနေ့ ၂၈၊ ၉၊ ၂၀၀၉ ရက်နေ့တွင် မွန်အမျိုးသားဒီမိုကရေစီအဖွဲ့ (လွတ်မြောက်နယ်မြေ) MNDF-LA သည် တစ်နှစ်ပြည့်မြောက်ခဲ့ပြီး ဖြစ်သည်။ မွန်အမျိုးသားဒီမိုကရေစီအဖွဲ့ (လွတ်မြောက်နယ်မြေ)သည် ပြည်တွင်းရှိ မွန်အမျိုးသားဒီမိုကရေစီအဖွဲ့ချုပ်မှ အဖွဲ့ခွဲတစ်ခုဖြစ် သည်။ ထို့ကြောင့် မွန်အမျိုးသားဒီမအဖွဲ့၏ ရည်ရွယ်ချက်နှင့် လုပ်ငန်းစဉ်များကို အကောင်အထည်ဖော် ဆောင်ရွက်လျက်ရှိသည်။

မွန်အမျိုးသား ဒီမိုကရေစီအဖွဲ့(MNDF)သည် လွတ်လပ်ခြင်း၊ တရားမျှတခြင်း၊ လူ့အခွင့်အရေးနှင့် အမျိုးသားကိုယ်ပိုင်ပြဌာန်းခွင့်၊ နိုင်ငံရေး တန်းတူမှုရှိသော ဒီမိုကရေစီ ဖက်ဒရာယ်ပြည်ထောင်စုထူထောင်ရန် အခြားနိုင်ငံရေးပါတီများနှင့် ပူးပေါင်းတိုက်ပွဲဝင်လျက်ရှိပါသည်။

မွန်အမျိုးသားဒီမိုကရေစီအဖွဲ့ (လွတ်မြောက်နယ်မြေ)သည် မွန်အမျိုးသားဒီမိုကရေစီအဖွဲ့ချုပ်၏ နိုင်ငံရေးလုပ်ငန်းစဉ်များကို လုပ်ကိုင် ဆောင်ရွက်ရင်း မွန်ရဟန်းသံဃာတော်အချို့နှင့် မွန်လူငယ်များတို့အား ဒီမိုကရေစီ၏ အဓိပ္ပာယ်အနှစ်သာရကို အပြန်အလှန် အစဉ်အမြဲ ဆွေးနွေးရှင်းလင်းခြင်းနှင့် တိုင်းရင်းသား နိုင်ငံရေးပါတီများနှင့်လည်း ပူးပေါင်းဆောင်ရွက်ရန်ကြိုးပမ်းနေပါသည်။ ဒီမိုကရေစီ နိုင်ငံတော် ကြီးများသို့ ရောက်ရှိနေသော မွန်လူငယ်များအနေဖြင့် ဒီမိုကရေစီစနစ်၏ အနှစ်သာရကို သိရှိနားလည်ပြီးဖြစ်၍ မွန်အမျိုးသား ဒီမိုကရေစီ အဖွဲ့ ပိုမိုအင်အားကောင်းလာစေရေးအတွက် ပူးပေါင်းပါဝင်ကြရန် လိုအပ်ပါသည်။

မွန်အမျိုးသားဒီမုိုကရေစီအဖွဲ့ (လွတ်မြောက်နယ်မြေ) အနေဖြင့် စစ်အစိုးရရေးဆွဲသော ၂၀၀၈ ခုနှစ် ဖွဲ့စည်းပုံအခြေခံဥပဒေသည် တိုင်းရင်းသားလူမျိုးများ လိုအပ်သော အခြေခံဥပဒေမဟုတ်ပဲ နိုင်ငံတော်ကို စစ်အစိုးရ ဆက်လက်အုပ်ချုပ်ရန် ရေးဆွဲထားသော အခြေခံ ဥပဒေတရပ်သာဖြစ်သည်။ ထို့ကြောင့်စစ်အစိုးရကျင်းပသော ၂၀၁၀ ရွေးကောက်ပွဲကိုလည်း ဝင်မည်မဟုတ်ကြောင်း အတိအလင်း ကြေငြာထားပြီးဖြစ်သည်။ ကုလသမဂ္ဂမှ တောင်းဆိုထားသည့်အတိုင်း နိုင်ငံရေးအကျဉ်းသားများကို အားလုံးလွှတ်ပေးရန်၊ နိုင်ငံရေးပါတီ များနှင့် ညှိနှိုင်းပြီး အခြေခံဥပဒေကို ပြန်လည်ပြင်ဆင်ရေးဆွဲပြီးမှ ရွေးကောက်ပွဲကျင်းပသင့်ကြောင်း မွန်အမျိုးသားဒီမိုကရေစီအဖွဲ့ (လွတ်မြောက်နယ်မြေ) က တိုက်တွန်းအပ်ပါသည်။

မွန်အမျိုးသားဒီမိုကရေစီအဖွဲ့ (လွတ်မြောက်နယ်မြေ) သည် မဟာမိတ်နိုင်ငံရေးပါတီများနှင့်အတူ စစ်အစိုးရကိုဖြုတ်ချပြီး ဒီမိုကရေစီ နိုင်ငံတော်သစ် ပေါ်ပေါက်သည်အထိ ဆက်လက်ပူးပေါင်း တိုက်ပွဲဝင်သွားမည် ဖြစ်ကြောင်း ထုတ်ပြန်ကြေငြာပါသည်။

မွန်အမျိုးသားဒီမိုကရေစီအဖွဲ့ (လွတ်မြောက်နယ်မြေ)
ဆက်သွယ်ရန် ဖုန်း ။     ။         ၀၈၅-၀၅၂-၇၃၀၆၊ နိုင်ဥဿာ