စံခရပူရီ(ဇွန်-၂၀)။     ။ထိုင်းမြန်မာနယ်စပ် ဘုရားသုံးဆူဒေသတလျှောက် ကျေးရွာများ၌ ယခုလဆန်းပိုင်းမှစ၍ တုတ်ကွေးရောဂါတစ်မျိုး ပြန့်နှံ့နေသည်ဟု သိရသည်။

ဘုရားသုံးဆူမြို့ရှိ မြန်မာဆရာဝန်တစ်ဦးက “ဒီရောဂါနာမည်ကို အတိအကျပြောဖို့ခက်ပါတယ်၊ လေကတဆင့် ပြန့်နှံ့ပြီးကူးစက်တာပါဘဲ၊ ခြင်ကမဟုတ်ဘူး၊ ပဋိဇီဝပိုးသတ်ဆေးတွေကို ကျနော်တို့ မသုံးကြသေးဘူး၊ ထိုင်းဆရာဝန်တွေလည်း ဒီလိုပါဘဲ ဖြစ်ပေါ်လာတဲ့လက္ခဏာတွေအပေါ် ဝေဒနာသက်သာအောင် ကုသပေးနေ တာပါဘဲ၊ ဥပမာ  အပူတက်ရင်အပူကျအောင်၊ ကိုက်ခဲရင် ကိုက်တဲ့ ဝေဒနာသက်သာအောင်၊ အဖုအပိတ်တွေ ထွက်ရင် ဆေးရည်လိမ်းပေးလိုက်တာတို့” ဟုဆိုသည်။

ထိုဒေသရှိ မွန်ကျန်းမာရေးမှူးတစ်ဦးကလည်း “ရောဂါဖြစ်တဲ့ သူတွေအားလုံး ဆေးရုံတစ်နေရာထဲ စုပြီးထားဖို့က အလျှင်မမီတော့ဘူး၊ နေရာလည်းဆန့်မှာမဟုတ်ဘူး၊ နေရာတိုင်းမှာ ပြန့်နှံ့နေပြီ၊ ချောင်းဆိုးနှာချေတာကနေ ကူးစက်တော့တာပါဘဲ” ဟု ဆိုပါသည်။

ဤတုတ်ကွေးရောဂါလက္ခဏာမှာ ရုတ်တရက်အဖျားတက်၍ ကိုယ်လက်များနာကျင်ကိုက်ခဲကာ လေဖြတ်သလို ခံစားကြရသည်။ အချို့မှာ လမ်းမလျှောက်နိုင်ပါ။ အများအားဖြင့် (၁၀) ဆယ်ရက်ခန့် ဝေဒနာခံစားကြရသည်ဟု ကြံတောရွာမှ မွန်ကျန်းမာရေးမှူးတစ်ဦးက ပြောပါသည်။

ရောဂါပျောက်ဆုံးချိန်၌ အချို့လူနာများတွင် ရေဖျဉ်းကဲ့သို့ အဖုအပိတ်များ၊ ဝက်သက်များကဲ့သို့ လက္ခဏာများ ဖြစ်ပေါ်တတ်ပြီး ယားယံဝေဒနာများကိုလည်းခံစားကြရသည်။

ဤတုတ်ကွေးရောဂါကြောင့် အသက်သေဆုံးသူမရှိသေးဟု မွန်ကျန်းမာရေးဌာနက ပြောကြားခဲ့သည်။ သို့သော် ဝေဒနာဖြစ်ပေါ်ချိန်တွင် အလွန်ခံစားရသည်ဟု ဆိုကြသည်။

ဆက်သွယ်မေးမြန်းချက်များအရ ထိုင်းမြန်မာနယ်စပ်ဘုရားသုံးဆူဒေသမြို့၊ အနီးတဝိုက်ရှိ ဂျပန်ရေတွင်းရွာ၊ ကြံတောရွာ၊ တပ်ရင်းသုံးရွာ၊ ရွာသစ်ရွာ၊ ကျော့ဗလု၊ ကျုံကဝီး၊ ချောင်းဆုံ (ကရိန်ထော)ရွာတို့တွင် အဆိုပါ တုတ်ကွေးရောဂါများ ပြန့်နှံ့နေသည်။

မွန်ပြည်သစ်ပါတီ မော်လမြိုင်ခရိုင်ဌာနချုပ် အနီးဒေသရှိ ကရင်ပြည်နယ်၊ ကြာအင်းဆိပ်ကြီးမြို့နယ် အင်းခွ ရွာတဝိုက်၊ တောင်ပေါက်၊ ဗိုကတော် စသည့်ကျေးရွာများတွင်လည်း ဤကဲ့သို့ တုတ်ကွေးရောဂါများ ခံစားနေ ကြရကြောင်း ဆက်သွယ်မေးမြန်းချက်များအရ သိရသည်။

ကြံတောရွာမှ ဆေးမှူးတစ်ဦးက ဤတုတ်ကွေးရောဂါမှာ မြန်မာနိုင်ငံကဝင်ရောက်လာသော ရွှေ့ပြောင်းအလုပ်သမား အချို့ထံမှ ကူးစက်ခံခဲ့ကြရသည်ဟု ဆိုသည်။

ဘုရားသုံးဆူမြို့၊ ဂျပန်ရေတွင်း၊ ကြံတော၊ တပ်ရင်းသုံးစသည့် ကျေးရွာများသည် ထိုင်းနိုင်ငံသို့ဝင်ရောက်ကြသည့် မြန်မာအလုပ်သမားများ ခေတ္တစခန်းချ နားခိုရာနေရာများ ဖြစ်နေသည်။