စံခလပူရီ(ဇူလိုင်-၈)။    ။ ကမ္ဘာအနှံ့ အလျှင်အမြန်ကူးစက်လျှက်ရှိသော A(H1 N1)ဝက်တုပ်ကွေးရောဂါကြောင့် ထိုင်းနိုင်ငံတွင် သေဆုံးသူစုစုပေါင်း ၁၁ ဦးရှိသွားပြီဟု ထိုင်းပြည်သူ့ကျန်းမာရေးဝန်ကြီး၏ ပြောဆိုချက်ကို ကိုးကားပြီး The Nation သတင်းတစ်ရပ်တွင် ယနေ့ဖေါ်ပြပါရှိသည်။

ဤရောဂါကြောင့် ထိုင်းနိုင်ငံ၌ ယမန်နေ့အထိသေဆုံးခံခဲ့ရသူ ၉ ဦးရှိခဲ့ရာ ဘန်ကောက်မြို့ရှိ ဗာဂျီရာဆေးရုံ
Vajira Hospital မှလူနာတစ်ဦး၊ ထိုင်းနိုင်ငံတောင်ပိုင်း ဖူးကက်ဆေးရုံတွင်တစ်ဦး ယနေ့အစောပိုင်းက ၂ ဦး ထပ်မံသေဆုံးခဲ့သည်ဟု ဆိုသည်။ များမကြာမီတွင် ၄င်းတို့နှင်ပတ်သက်သော အစီရင်ခံချက်ကို သက်ဆိုင်ရာ အာဏာပိုင်များမှတဆင့် ထုတ်ပြန်သွားမည်ဟု ဆိုပါသည်။

ထိုင်းကျန်းမာရေးဝန်ကြီးဌာနမှ ထုတ်ပြန်ခဲ့သောစာရင်းအရ ထိုင်းနိုင်ငံတစ်ဝှန်းတွင် ရောဂါကူးစက်ခံရသူ ၂၇၁၄ ဦးရှိသွားပြီဟု ဆိုပါသည်။ လက်ရှိ ဆေးကုသခံနေရသူ ၁၁၀ ဦးတွင် ၈ ဦးမှာရောဂါဝေဒနာ ပြင်းထန်စွာ ခံစားနေ ကြရသည်။

မြန်မာနိုင်ငံ၌ ဝက်တုတ်ကွေးရောဂါ စတင်တွေ့ရှိခဲ့သူ စင်ကာပူနိုင်ငံမှ ပြန်လာသော ၁၃ နှစ်အရွယ်မိန်းကလေး ငယ်မှာ အခြေအနေကောင်းမွန်လာ၍ မကြာမီရက်ပိုင်းတွင် ဆေးရုံမှ ဆင်းခွင့်ရရှိတော့မည်ဟု သိရသည်။

ထို ၁၃ နှစ်အရွယ်မိန်းကလေးငယ်နှင့် ပတ်သက်၍ သံသယအဖြစ် စောင့်ကြည့်ခံရသူ ၃၄ ဦးရှိခဲ့သည်။ ရောဂါလက္ခဏာမတွေ့သဖြင့် ယခုအခါလွတ်လွတ်လပ်လပ် သွားလာနိုင်ကြပြီဟု သတင်းဌာနအချို့တွင် ဖေါ်ပြပါရှိသည်။

မြန်မာနိုင်ငံနယ်ငံခြားဝင်ထွက်ပေါက်အားလုံး၌ လွန်ခဲ့သည့်ဧပြီလ ၂၈ ရက်နေ့မှစ လေကြောင်း၊ ရေကြောင်း၊ ကုန်လမ်းနယ်စပ် အဝင်အထွက်ပေါက်များတွင် လူတစ်သိန်းခုနှစ်သောင်းကျော်ကို ဤဝက်တုတ်ကွေးနှင့် ပတ်သက်၍ စစ်ဆေးခဲ့ရသည်ဟု မြန်မာကျန်းမာရေးဌာနမှ ဆရာဝန်တစ်ဦးက သတင်းဌာနများကို ပြောကြား ခဲ့သည်။

သို့ရာတွင် မြန်မာကျန်းမာရေးဌာနများအနေဖြင့် ခေတ်မီစမ်းသပ်ကရိယာများ မရှိသဖြင့် လေဆိပ်အဝင်အထွက် များတွင် သာမန်အဖျားတိုင်းကရိယာများနှင့်သာ တိုင်းတာနေရသည်ကို တွေ့မြင်နေရသည်။

ကမ္ဘာ့ကျန်းမာရေးအဖွဲ့ WHO ၏နောက်ဆုံးထုတ်ပြန်ကြေညာချက်တစ်ရပ်တွင် ကမ္ဘာအနှံ့ နိုင်ငံပေါင်း ၁၃၀ ၌ ရောဂါကူးစက်ခံခဲ့ရသူ ကိုးသောင်းကျော်ရှိခဲ့သည်ဟု ဖေါ်ပြထားသည်။ ကမ္ဘာ့ကပ်ရောဂါအဖြစ် သတိပေးမှု
အဆင့် ၆ အမြင့်ဆုံး သတ်မှတ်ထားဆဲဖြစ်သည်။

ယခုတုတ်ကွေးမှာ ဝက်က စသည်ဆိုသော်လည်း ဝက်သားစား၍မကူး၊ ဝက်များတွင် ရောဂါမဖြစ်၊ လူများတွင်
သာဖြစ်လေ့ ရှိသည်။ ဤရောဂါနှင့်ပတ်သက်၍ အမည်တစ်မျိုးတည်း ခေါ်ဆိုသတ်မှတ်ရန် ကမ္ဘာ့နိုင်ငံအနှံ့အပြား တွင် အငြင်းပွားလျှက်ရှိသည်။