ယမန်နေ့ မနက်က ထိုင်းဝန်ကြီးချုပ် ထုတ်ပြန်ခဲ့တဲ့ အရေးပေါ်အမိန့်ဟာ လေပေါ်မှာ လွင့်ပျယ်သွားသလို ဖြစ်နေပါပြီ၊ စစ်တပ်အကြီးအကဲက ဆန္ဒပြသူများအပေါ် အကြမ်းနည်းမသုံးပါဘူး၊ လုံခြုံရေးအရ စစ်တပ်အင်အား (၄၀၀) လက်နက် မကိုင်ပဲ စောင့်ကြည့်စေမယ်၊ ဝန်ကြီးချုပ်ရုံးကို သိမ်းထားတဲ့ ပီအေဒီ PAD ပါတီ အတိုက်အခံ ဆန္ဒပြအုပ်စုက အပြောအဟော နဲ့ သီချင်းအဆို မပျက်၊ ပြီးခဲ့တဲ့ရက်နေ့တွေထက် အင်အားပိုများလာသလိုပဲ။

သတင်းဌာနများအဆိုအရ အင်အား (၅၀၀) ခန့် ရှိတဲ့ ဝန်ကြီးချုပ်ကို ထောက်ခံသူ တန်ပြန်ဆန္ဒပြသမားများ အဓိကရုဏ်း စတင်ခဲ့လို့ နှစ်ဖက်ကြားရိုက်နှက်မှုတွေ ဖြစ်ပွားပြီး ရဲများ ကြားဝင် ဖျန်ဖြေမနိုင်တော့ပဲ လက်ကိုင်နံပါတ်တုတ်နဲ့ စစ်တပ် ဝင်ရောက်တော့မှ အခြေအနေပုံမှန် ပြန်ရောက်လာတယ်၊ တစ်ဦးသေ၊ (၄၀) ကျော် ဆေးရုံတင်လိုက်ရတယ်။

နိုင်ငံပိုင် စီးပွားရေးလုပ်ငန်းမှ အင်အား (၂၀၀၀၀) ကို ကိုယ်စားပြုတဲ့ အလုပ်သမားသမဂ္ဂက PAD ဆန္ဒပြမှုမှာ ပါဝင်လာပြီး အစိုးရရုံးတွေရဲ့ ရေ၊ မီး၊ တယ်လီဖုန်းလိုင်းတွေကို ဖြတ်တောက်မယ်၊ မီးရထား၊ လေယာဉ်၊ ဘတ်စ်ကား ဝန်ထမ်းတွေကအစ အစိုးရကို အမျိုးအမျိုး အကြပ်အကိုင်နေပြန်တယ်။

အကြမ်းဖက် တိုက်ခိုက်မှုတွေ ဖြစ်ပွားလာမှာစိုးရိမ်တာကြောင့် သက်ဆိုင်ရာ တိုင်းပြည်ရဲ့ အစိုးရက သတိပေးမှုတွေ ရှိလာခဲ့ပြီးနောက် ထိုင်းနိုင်ငံက ကမ္ဘာလှည့်ခရီးသည်များ ပြည်တော်ပြန်ခဲ့ကြရတယ်။ အစိုးရရဲ့ တစ်နေ့ဝင်ငွေ ဆုံးရှုံးမှုကို မခန့်မှန်းနိုင်၊ အစိုးရရုံးထမ်း ၃၀၀၀ ခန့်ဟာလည်း မိမိဝန်ကြီး ရှိရာသို့ လိုက်ရှာပြီး ရုံးတက်နေရတယ်။

ထိုင်းရွေးကောက်ပွဲ ကော်မရှင် ဥက္ကဌက ပြီးခဲ့တဲ့ရွေးကောက်ပွဲမှာ ဝန်ကြီးချုပ် စမတ်ရဲ့ ပီပီပီ (People Power Party - PPP) မဲလိမ်မှုတွေ ရှိခဲ့တယ်၊ (PPP) ပါတီကို ဖျက်သိမ်းပေးဖို့ မနေ့ကတောင်းဆိုလိုက်ပြန်တော့ စမတ်ရဲ့ အကြပ်အတည်း နောက်ထပ်တစ်ရစ်ထပ်တိုး လာပြန်တယ်။

ဒီကြားထဲ စမတ်ကို ရုပ်သေးလိုကြိုးကိုင်နေတဲ့ ဝန်ကြီးချုပ်ဟောင်း သက်ဆင် ပိုင်ဆိုင်တဲ့ မန်ချက်စတာ စီးတီးဘောလုံး အသင်းကို အာရပ်စော်ဘွား တစ်ယောက်ထံ စတာလင်ပေါင် သန်း(၂၀၀)ကျော်နဲ့ ရောင်းလိုက်တာ စမတ်ကို နောက်က ငွေကြေးထောက်ပံ့ပေးဖို့လား ဆိုပြီး ကောလဟာလ သတင်းတွေ ပြန့်လွင့်နေပြန်တယ်၊ အရပ်စကားနဲ့ ပြောနေကြတာကတော့ အနီရောင် သင်္ကေတ တန်ပြန် ဆန္ဒပြအုပ်စုက လူတစ်ယောက်ကို တစ်နေ့ ဘတ် (၅၀၀)နဲ့ ငှားထားတယ်ဆိုပဲ၊ ဒီမှာက  အဲဒီအုပ်စုကို "ဖွတ်ကြား" လို့ မြန်မာမှုပြုကြတယ်၊ မြန်မာပြည်က "ကြံ့ဖွတ်" တွေလိုပေါ့၊ အခုမပြုတ်တပြုတ် ငွေ့ငွေ့လေးသာ ကျန်တော့တဲ့ စမတ်က မြန်မာပြည်က "ကြံ့ဖွတ်" နယကကြီးမှာ နည်းနာယူပြီး "ဖွတ်ကြား" အဖွဲ့ကို ကော်ပီ ဆွဲထားဟန် တူတယ်။

အတိုက်အခံခေါင်းဆောင် စမ်မလောင်းဆိုလျှင် စိတ်ဓါတ် ကြံ့ခိုင်မှုနဲ့ အတွေ့အကြုံတွေအရ လက်ရှိ ဝန်ကြီးချုပ်ထက် အများကြီးရင့်ကျက်ပါတယ်၊ ၁၉၉၂ - ၉၃ ခု ဗိုလ်ချုပ်ကြီး ဆူချင်တာ လက်ထက်ကို မှီခဲ့လျှင် သိပါလိမ့်မယ်၊ စစ်တပ်က လက်နက်နဲ့ နှိမ်နင်းခဲ့တဲ့ အနေအထားနဲ့အခုအခြေအနေကိုသုံးသပ်လျှင် ဝန်ကြီးချုပ်နဲ့ အစိုးရ မဖျက်သိမ်းချင်းတော့ "နောက်ဆုံးတိုက်ပွဲ"ကို ဆက်လက်ဆင်နွဲ တိုက်ပွဲဝင် နေဦးမှာပဲ။

ထိုင်းသတင်းထောက်တစ်ဦး အဆိုအရ ဒီနေ့မှာ ထိုင်းအထက်လွှတ်တော်အမတ် (၁၄)ဦး၊ တတ်သိပညာရှင် (၅၈) ဦး၊ တက္ကသိုလ် (၂၆) ကျောင်းမှ ပါမောက္ခများက ထိုင်းနိုင်ငံ အခြေအနေအရပ်ရပ်ကို သုံးသပ်ပြီး ဝန်ကြီးချုပ် "စမတ်" တိုင်းပြည်ရဲ့ မျက်နှာကို ထောက်ရှုပြီး လက်ရှိပါလီမာန်ကို ဖျက်သိမ်းသင့်ကြောင်း ထုတ်ဖော်ကြေငြာချက်တွေကို ကြည့်ယင် "စမတ်" အစိုးရ လက်မတင်လေးသာ ရှိတော့ပါကြောင်း။