မွန်အမျိုးသားများအတွက် လွတ်လပ်သည့် ကိုယ်ပိုင်ပြည်နယ် ရှိသင့်ကြောင်း သြစတြေးလျ အထက်လွှတ်တော်အမတ်တဦး ဖြစ်သည့် Gary Humphries က မြို့တော် ကင်ဘာရာတွင် ကျင်းပသည့် ၆၅ ကြိမ်မြောက် မွန်အမျိုးသားနေ့တွင် ပြောကြားခဲ့သည်။

သြစတြေးလျ အထက်လွှတ်တော် အမတ် Gary Humphries (ပုံ:garyhumphries.com)

“မွန်လူမျိုးတွေဟာ ကိုယ်ပိုင် ပြည်နယ်နဲ့ လွတ်လွတ်လပ်လပ် ထိုက်တန်မှု ရှိသင့်တယ်၊ မွန်ပြည်နယ်မှာ ဒီမိုကရေစီ အခွင့်အရေး ပေါ်ထွန်းလာဖို့အတွက် ဆက်လက်ပြီးတော့ ထောက်ခံ သွားမယ်” ဟု Gary Humphries က ထိုအခမ်းအနားတွင် ပြောသည်။ 

အခမ်းအနားသို့ လူ ၃၀၀ ခန့် တက်ရောက်ခဲ့ပြီး သြစတြေးလျ အမျိုးသား တက္ကသိုလ်မှ ဧည့်သည်တော်အဖြစ် ဖိတ်ကြားခံရသည့် Trevor Wilson လည်း တက်ရောက်ခဲ့ကာ မွန်ပြည်နယ်တွင် ဒီမိုကရေစီ ပြုပြင်ပြောင်းလဲမှု ဖြစ်ပေါ်လာပါက သြစတြေးလျရောက် မွန်များအနေနှင့် မြန်မာနိုင်ငံရှိ မွန်လူမျိုးများကို ကူညီရန်အတွက် စဉ်းစားထားသင့်ကြောင်း ပြောကြားခဲ့သည်။
 
“မွန်ပြည်နယ်မှာ ရှိနေတဲ့ မွန်တွေကို ကူညီဖို့အတွက် ဘယ်အခန်းကဏ္ဍက ကိုယ်လုပ်ပေးနိုင်သလဲဆိုတာ စဉ်းစားထားသင့်တယ်” ဟု Trevor Wilson က ပြောသည်။

သြစတေးလျ မွန်အမျိုးသားနေ့ အခမ်းအနားတွင် မွန်လူမျိုးများက မိမိတို့၏ ရိုးရာအကများအပြင် ခေတ်သစ် ခေတ်ဟောင်း မွန်တေးသီချင်းများဖြင့် ဖျော်ဖြေကြပြီး၊ မွန်အစားအစာများဖြင့် ဧည့်ခံကျွေးမွေးကြသည်။

သမလ၊ ဝိမလ မင်းညီနောင်နှစ်ပါး ဟံသာဝတီ မင်းနေပြည်တော်ကို စတင်တည်ထောင်ခဲ့သည့် တပို့တွဲလပြည့်ကျော် ၁ ရက်နေ့ကို မွန်အမျိုးသားနေ့အဖြစ် သတ်မှတ်ကာ ၁၉၄၈ ခုနှစ်မှ စတင်ကျင်းပခဲ့သည်။

(Photo:SiriMon Chan)

သာသနာသက္ကရာဇ် ၁၁၁၆ (အေဒီ ၅၇၃) တပို့တွဲလပြည့်ကျော် ၁ ရက်နေ့တွင် ဟံသာဝတီ မင်းနေပြည်တော်ကို တည်ထောင်ခဲ့သည်။