မင်းထက်အောင်(အောက်တိုဘာ-၇)။ ။ မှန်လုံအမြန်ယာဉ်တစ်စီး ယနေ့နံနက်ပိုင်း၌ ထိုင်းနိုင်ငံတစ်နေရာအတွင်း လမ်းဘေးထိုးကျတိမ်းမှောက်ခဲ့သဖြင့် ဒဏ်ရာရရှိမှုများဖြစ်ပေါ်ခဲ့ရာတွင် သေဆုံးသူမရှိဟု သိရသည်။

ယမန်နေ့ကရနောင်းမြို့တွင် မြန်မာယာယီပတ်စပို့ပြုလုပ်အပြီး မြန်မာနိုင်ငံသားများကို ပြန်လည်တင်ဆောင်လာစဉ် စာမွတ်စာခွန်ခရိုင် မယ့်ဂလောင်မြို့နှင့် မဟာချိုင်မြို့အကြား အဝေးပြေးကားလမ်းမကြီးပေါ်၌ ရောက်ရှိမောင်းနှင်နေစဉ် လမ်းဘေးအရံအတားများနှင့် အရှိန်ပြင်းထန်စွာပွတ်တိုက်မိပြီး လမ်းဘေးထိုးကျခဲ့သည်ဟု မျက်မြင်တွေ့ရှိသူများ ပြောပြချက်အရ သိရသည်။

ယာယီမြန်မာနိုင်ငံကူးလက်မှတ်ပြုလုပ်ခဲ့သူများ မှန်လုံအမြန်ယာဉ်ပေါ်မတက်မီအမှတ်တရရိုက်ကူးထားပုံ (Photo: Kaowao)

“အပြင်းထန်ဆုံး ဒဏ်ရာကဒေါ်သန်းဝင်း တစ်ဦးပဲထိတယ်၊ ခြေထောက်တစ်ဖက်မှာပဲ နှစ်နေရာခွဲစိတ်ခံရမယ်၊ ကျန်တဲ့သူတွေက အခြေအနေကောင်းပါတယ်” ဟု တာဝန်ကျထိုင်းဆရာဝန်တစ်ဦးက ပြောသည်။

အဆိုပါဒဏ်ရာရရှိသူ ဒေါ်သန်းဝင်းမှာ မွန်ပြည်နယ်၊ ရေးမြို့နယ်၊ ကုလားဂုတ်ကျွန်း၊ အောက်ဆိပ်ဇာတိဖြစ်ပြီး လက်ရှိမဟာချိုင်၌ မိသားစုများနှင့်အတူ အလုပ်လုပ်ကိုင်နေသည်ဟု ၄င်းအသိအကျွမ်းများထံမှ သိရှိရသည်။

အဆိုပါဒဏ်ရာရရှိသူအားလုံးကို မယ့်ဂလောင်မြို့ အမှတ်(၂) ဆေးရုံ၌ ကုသခံနေဆဲ ဖြစ်သည်ဟု ဆေးရုံဝန်ထမ်းးတစ်ဦးထံမှ သိရသည်။

၎င်းတိမ်းမှောက်ခဲ့သော မှန်လုံအမြန်ယာဉ်တွင် မြန်မာနိုင်ငံသား(၃၉) ဦးတင်ဆောင်ခဲ့သည်ဟုလည်း ယာယီနိုင်ငံကူးလက်မှတ် မြန်မာပတ်စပို့အတူပြုလုပ်ခဲ့သူ သံဖြူဇရပ်မြို့နယ်၊ ပငရွာသား မင်းအဗလိုင်က ပြောသည်။

“အခုမှောက်တဲ့ကားက ကျနော်တို့ရှေ့ကကားပဲ၊ ကားမှောက်နေတာ၊ ဒဏ်ရာရတဲ့လူတွေကိုသယ်ထုတ်တာ မြင်ရပေမယ့် အနီးကိုသွားကြည့်ခွင့်မရှိဘူး၊ ရဲကပိတ်ထားတယ်၊ ကျနော်တို့ ပိတ်စပို့တွေကိုလည်း စစ်တယ်”ဟု မင်းအဗလိုင်က ပြောသည်။

၎င်းအပြောအရ ပြီးခဲ့သည့်အောက်တိုဘာလ(၅) ရက်နေ့ ညနေပိုင်းတွင် မဟာချိုင်မြို့မှ မှန်လုံအမြန်ယာဉ်(၃) စီးဖြင့် ရနောင်းမြို့သို့ ထွက်ခွာခဲ့ပြီး ယာယီပတ်စပို့ကို ယမန်နေ့၌တစ်ရက်နှင့်အပြီး ပြုလုပ်ခဲ့ရာ ယခုအပြန်ခရီး၌ ယာဉ်တိမ်းမှောက်မှုဖြစ်ပေါ်ခဲ့ခြင်း ဖြစ်သည်။

အဆိုပါအလုပ်သမားများကို ယာယီပတ်စပို့ပြုလုပ်ပေးနေသည့် Nitipon ကုမ္ပဏီအစီအစဉ်ဖြင့် ရနောင်းမြို့သို့ ပို့ဆောင်ခဲ့သည်ဟု ယင်းကုမ္ပဏီနှင့်နီးစပ်သူတစ်ဦး ပြောပြချက်အရ သိရသည်။

၎င်းယာဉ်တိမ်းမှောက်ရာတွင် ထိုင်းနိုင်ငံ၌အလုပ်ဝင်ရောက်လုပ်ကိုင်နေသူ ရှမ်းပြည်နယ်တောင်ကြီးမြို့နှင့် ကရင်ပြည်နယ်ကော့ကရိတ်မြို့နယ်သား အချို့လည်းရှိပြီး မွန်ပြည်နယ်သားများ အများဆုံးပါဝင်သည်ဟု သိရသည်။