မင်းထက်အောင်(နိုဝင်ဘာ-၅)။ ။ မော်လမြိုင်မြို့နယ်၊ ကျောက်တန်းကျေးရွာ၌ ပြည်ခိုင်ဖြိုးပါတီမှ ခုနှစ်တန်း၊ရှစ်တန်းကျောင်းသူများကိုအသုံးပြုပြီး မဲဆွယ်စည်းရုံးရေးဆင်းနေရကြောင်း ပြည်တွင်းမှ လူငယ်တစ်ဦးသတင်းရေးသားပေးပို့ချက်အရ သိရသည်။

သက်ဆိုင်ရာရယကမှ အတင်းအကြပ်အမိန့်ပေး စေခိုင်းမှုကြောင့် ထိုကဲ့သို့မဲဆွယ်နေရခြင်း ဖြစ်ကြောင်း ကျောင်းသူများကဒေသခံများကိုပြောသည်ဟု ယင်းသတင်းပေးပို့ချက်တွင် ဖေါ်ပြပါရှိသည်။

ထို့အပြင် မော်လမြိုင်မြို့အတွင်းရှိ ရယကရုံးများတွင် မဲနံပါတ်သွားရောက်ကြည့်ရှု တောင်းခံသူများကိုလည်း ပြည်ခိုင်ဖြိုးပါတီစည်းရုံးရေး စာရွက်များပေးဝေခဲ့သည်ဟုလည်း သိရသည်။

လွန်ခဲ့သည့်နှစ်ရက်ခန့်က ပြည်ခိုင်ဖြိုးပါတီမဲဆွယ်စာစောင်များတွင် လူတချို့က ညစ်ညမ်းသောစာသားများ ရေးသားထည့်သွင်းပြီး မော်လမြိုင်မြို့အနှံ့ကြဲခဲ့ကြောင်း မျက်မြင်သက်သေတစ်ဦးကပြောသည်။

ရွေးကောက်ပွဲရက်နီးကပ်လာသည်နှင့်အမျှ ပြည်ခိုင်ဖြိုးပါတီက စည်းရုံးရေးလုပ်ငန်းများကို တရားမျှတသည်ဖြစ်စေ၊ မမျှတသည်ဖြစ်စေတိုးမြှင့်လုပ်ဆောင်နေကြောင်း မော်လမြိုင်မြို့ခံ ရှေ့နေတစ်ဦး ပြောသည်။

“အရှေ့တောင်တိုင်းက တပ်မိသားစုတွေလည်း ကြံ့ဖွတ်လုပ်ကိုင်ပုံကို မကြေနပ်လို့ တခြားပါတီ တွေကိုပဲ မဲပေးကြမှာ၊ ဒါပေမယ့် ကြိုတင်မဲဆိုပြီး အရာရှိတွေရှေ့မှာထည့်ခိုင်းရင်တော့ ဘာမှလည်းမတတ်နိုင်ပါဘူး” ဟု မွန်ဒေသလုံးဆိုင်ရာဒီမိုကရေစီပါတီ ထိပ်ပိုင်းခေါင်းဆောင်တစ်ဦးနှင့် ဆက်သွယ်မေးမြန်းချက်တရပ်၌ ထိုသို့ယူဆပြောဆိုခဲ့သည်။

နယ်မြို့များ၌ ပြည်ခိုင်ဖြိုးပါတီစည်းရုံးရေးဆင်းရာတွင် ၄င်းတို့ပါတီသည် မွန်ဖြစ်သည်ဟုလည်း ဒေသခံများကြားတွင် လိမ်လည်ပြောဆိုစည်းရုံးမှုများ ပြုလုပ်နေသည်။

မွန်ပြည်နယ် ပြည်ခိုင်ဖြိုးပါတီဝင်အချို့ကလည်း ကျေးရွာအချို့၌ ဒေသခံကျောင်းသူများကို မွန်တိုင်းရင်းသားဝတ်စုံဝတ်ဆင်စေ၍ စည်းရုံးရေးဆင်းခိုင်းနေသည်ကိုလည်း တွေ့ရှိရသည်။

အလားတူ မန္တလေးမြို့ပြည်ခိုင်ဖြိုးဆိုင်းဘုတ်တင်ပွဲတစ်ခုတွင်လည်း မြန်မာအမျိုးသမီးများကို မွန်တိုင်းရင်းသူဝတ်စုံဝတ်ဆင်စေကာ လုပ်ကြံဝါဒဖြန့်မှုများ ပြုလုပ်ခဲ့သည်ကို အင်တာနက်သတင်းများတွင် တွေ့ရှိနိုင်သည်။