ဘန်တုံယန်းမြန်မာဒုက္ခသည်စခန်းကို ယမန်နေ့မွန်းလွဲပိုင်းတွင် မိုးများနှင့်အတူလေပွေပြင်းတစ်ခု ရုတ်တရက်ဝင်ရောက်မွှေနှောက်တိုက်ခတ်ခဲ့မှုကြောင့် အိမ်ခြေငါးဆယ်ခန့်ပျက်စီးပြီး ဒုက္ခသည်နှစ်ရာခန့် အိုးမဲ့အိမ်မဲ့ဖြစ်သွားခဲ့ရကြောင်း ကာယကံရှင်များပြောပြချက်အရ သိရသည်။

ပုံ- panoramio.com ထိုင်းနယ်စပ်ရှိမြန်မာဒုက္ခသည်စခန်းအနက် Sangkhlaburi မြို့နယ်ရှိဘန်တုံယန်း နေရာမြေပုံ

အဆိုပါဒုက္ခသည်စခန်းမှ ကျောင်းဆရာဟောင်း နိုင်ဂျနူရွတ်က “ ရပ်ကွက်စာသင်ကျောင်းတစ်ကျောင်း အပါအဝင်ဆေးရုံနဲ့ ဌာနဆိုင်ရာအဆောက်အဦတွေနဲ့ ထိုင်းလုံခြုံရေးတန်းလျားတွေ ပျက်စီးခဲ့တယ်၊ စစ်ပြေးဒုက္ခသည်ကနေ လေဘေးဒုက္ခသည် ဖြစ်ရပြန်တယ်ဗျာ” ဟု ဖြစ်စဉ်အသေးစိတ်ကို ရှင်းပြသည်။
ထို့အပြင် မိုးရွာသွန်းချိန်တစ်နာရီခန့်ရှိပြီး (၁၀) မိနစ်ခန့်သာလေပွေတိုက်ခတ်ခဲ့ရာ ခြေမ၊ လက်မခန့်အရွယ်ရှိ မီုးသီးများကြွေကျခဲ့သည်ဟုလည်း ဆိုပါသည်။

တဖန် စခန်းနေကိုဘထူးလေးဆိုသူက “သစ်ပင်တွေ လဲကျတယ်၊ လူအသေအပျောက်မရှိပေမယ့် ဒဏ်ရာနည်းနည်းပါးပါးရတာတော့ ရှိကြတယ်၊ ခုတော့ပြန်လည်ထူထောင်ရေးတွေ လုပ်နေကြပါပြီ” ဟု ပြောကြားပါသည်။ 

အဆိုပါလေပွေဒဏ်ကြောင့် ကွန်ပျုတာအဆောက်အဦးတစ်ခုပျက်စီးခဲ့ပြီး ကွန်ပျူတာ (၂၀) လုံးခန့် မိုးဒဏ်ကြောင့် ဆုံးရှုံးခဲ့ရသည်။

ထို့အပြင် ရိက္ခာဆန်များထုတ်ပေးနေစဉ် မိုးလေများလာသဖြင့် ဆန်ဝေငှပေးနေသည်ကို ရပ်ဆိုင်းလိုက်ရပြီး ဆန်ဂိုထောင်တစ်လုံးလည်း လေပွေကြောင့် အမိုးများလွင့်စင်ခဲ့ရာ ရိက္ခာဆန်အချို့ မိုးရေစိုသွားသည်။

ဘန်တုံယန်းဒုက္ခသည်စခန်းမြင်ကွင်း

ယင်းလေပွေတိုက်ခတ်မှုကြောင့် ပျက်စီးဆုံးရှုံးမှုများ မည်မျှရှိသည်ကို မခန့်မှန်းနိုင်သေးပေ။
တစ်ချိန်တည်းတွင်ပင် စံခလပူရီမြို့နယ်အနှံ့အပြားတွင်လည်း မိုးနှင့်အတူလေပြင်းများ ကျရောက်ခဲ့သည်။
အဆိုပါ ဘန်တုံယန်းဒုက္ခသည်စခန်းသည် ထိုင်းနိုင်ငံ၊ ကန်ချနပူရီခရိုင်၊ စံခလပူရီမြို့နယ်နှင့် မွန်ပြည်နယ်တို့ ထိစပ်လျှက် ထိုင်းနယ်မြေအတွင်း တည်ရှိသည်။ တနည်းဆိုရသော် ဟလောက်ဟနီမွန်ဒုက္ခသည် စခန်းအနီး ဖြစ်ပါသည်။

ဘန်တုံယန်းစခန်းရှိ ကွန်ပျူတာခန်း

ယင်းဒုက္ခသည်စခန်းတို့ကို စံခလပူရီမြို့မှ တစ်နာရီခန့်အကြာ မော်တော်ကား၊ မော်တော်ဆိုင်ကယ်တို့ဖြင့် ရာသီမရွေးသွားလာနိုင်သည်။ သို့သော် တစ်ပတ်တွင် တနင်္လာနေ့နှင့် သောကြာနေ့၊ နေ့ပိုင်းမျာတွင်သာ လိုင်းကားများ ခရီးသွားခွင့်ရှိသည်။

စခန်းတာဝန်ခံတစ်ဦးအဆိုအရ ဘန်တုံယန်းစခန်းတွင် လက်ရှိဒုက္ခသည် (၄၂၀၀) ဦးခန့်ရှိနေကြောင်း စာရင်း၌ဖေါ်ပြထားပါသည်။ ၁၉၉၇ ခုနှစ်တွင် စခန်းစတင်ဖွင့်လှစ်ခဲ့သည်ဟု သိရသည်။

အထူးသဖြင့် တတိယနိုင်ငံများသို့ထွက်ခွာရန် စောင့်ဆိုင်းနေကြသည့် ဗမာ၊ မွန်၊ ကရင်၊ ထားဝယ်နှင့် အခြားမြန်မာနိုင်ငံတိုင်းရင်းသားများ နေထိုင်လျှက်ရှိသည်။