နော်ဖေါ (၂၂-သြဂုတ်)။    ။၂ဝ၁ဝ ရွေးကောက်ပွဲမှာ ဝင်ရောက်ယှဉ်ပြိုင်မည့် တစည (ခေါ် ) တိုင်းရင်းသားစည်းလုံးညီညွတ်ရေး ပါတီသည် မွန်ပြည်နယ်၊ ရေးမြို့နယ် မြောက်ဘက်ခြမ်းက ကျေးရွာတွေကို သြဂုတ်လ (၁၈) ရက်နေ့တွင် တစ်ရွာလျှင် လူဦးရေ (၅ဝ) ခန့် ကိုပါတီဝင်ကဒ်များ ထုတ်ပေးခြင်းဖြင့် မဲဆွယ်စည်း ရုံးခဲ့ပါသည်။

တစညပါတီသည် မွန်အမျိုးသားများအတွက် အကျိုးဆောင် ပေးမည်ဟုဆိုပြီး နယ်ကိုယ်စားလှယ်အဖြစ် ရွေး ကောက်ပွဲတွင် ဝင်ရောက်ယှဉ်ပြိုင်မည့် ရေးမြို့နယ် တစညပါတီဥက္ကဌ ဦးလှမောင်က ရေးမြို့နယ်မြောက် ဘက်ခြမ်း၌ရှိသော အံဒင်၊ နှီးနှော၊ အဘော်ရွာများတွင် တစ်ရွာလျှင် လူအယောက် (၅ဝ)ခန့် ပါတီဝင်ကဒ် ထုတ်ပေးခဲ့ခြင်းဖြစ် စည်းရုံးခဲ့သည်။

“ရေးမြို့နယ်အတွင်း သွားလာတဲ့အခါမှာ ပါတီဝင်ကဒ်ထုတ်ပြနိုင်မယ်ဆိုရင် ယာဉ်ထိန်း ရဲတွေက မစစ်ဆေးဘူး။
ကျေးရွာအတွင်းမှာ လုပ်အားပေးရတဲ့အခါမှာလည်း ကိုယ်ကလုပ်အားပေးဖို့မလိုဘူး။ ပိုက်ဆံကောက်တဲ့ အခါ မှာလည်းပေးစရာမလိုဘူး” ဟု ရေးမြို့နယ်အတွင်းက ပါတီဝင်ကဒ်ရရှိထားတဲ့ ပါတီဝင်တစ်ယောက်က ပြောပါ သည်။

အလားတူ ရေးမြို့နယ်တောင်ပိုင်းဒေသက ကလော့၊ ဟံဂါံရွာတွေကိုလည်း ပြီးခဲ့သည့်သြဂုတ်လ(၁၉) ရက်နေ့ တွင် ပါတီဝင်ကဒ်ထုတ်ပေးခြင်းဖြင့် သွားရောက်စည်းရုံးခဲ့ပါသည်၊၊

တစညပါတီသည် ယခင်မြန်မာ့ဆိုရှယ်လစ်လမ်းစဉ်ပါတီကနေ အသွင်ပြောင်းလာတဲ့ ပါတီတစ်ခုဖြစ်ပါသည်။ ၄င်းတို့သည် ၁၉၉ဝ ရွေးကောက်ပွဲတုန်းကလည်း ပါဝင်ယှဉ်ပြိုင်ခဲ့ပါသည်။

သို့သော်အမတ်နေရာ အနည်းငယ် ဖြင့်ရှုံးနိမ့်ပြီး ယခု၂ဝ၁ဝ ရွေးကောက်ပွဲကိုဆက်လက်ဝင်ရောက်ခြင်း ဖြစ်ပါသည်၊၊ ၄င်းတို့စည်းရုံးရေးဆင်းရာမှာ ရေးမြို့နယ်တွင်စည်းရုံးရေး(၂) ကြိမ်ပြုလုပ်သွားခဲ့ပြီး ပထမတစ်ကြိမ်ကို ပြီးခဲ့သည့် သြဂုတ်လ (၈) ရက်နေ့မှာ ပြုလုပ်ခဲ့ပါသည်။