ဆူးပန်း(ဇန်နဝါရီ- ၂၇)။    ။ဒုဗိုလ်မှူးကြီးတင်မောင်မောင်ဦးစီးသော ခမရ(၄ဝ၇)တပ်ရင်းမှ စစ်အင်အား(၅ဝ) ခန့်သည် အပစ်ရပ်အဖွဲ့တခုဖြစ်သည့် မွန်ပြည်သစ်ပါတီတပ်တည်ဧရိယာဖြစ်သော ဘုရားသုံးဆူမြို့နယ် တဒိန်ကျေး ရွာတွင် အခြေပြုတပ်စွဲထားသည်မှာ တစ်လကျော်ရှိနေပြီးဖြစ်သည်။ ၄င်းတပ်ဖွဲ့အနေနှင့် စစ်ရေးလှုပ်ရှားမှုမရှိဘဲ ခရီးသည်တင်ကားများအပေါ်တွင် အကောက်ငွေများကောက်ခံခြင်း ရွာသားများ၏ ပစ္စည်းများကို ခိုးဝှက်ခြင်း မွန်ပြည်သစ်ပါတီ၏ အုပ်ချုပ်ရေးယန္တယားများပျက်ပြားအောင် လုပ်ဆောင်နေသည်ဟု  ဒေသခံ များမှပြောပါသည်။
 
ထို့အပြင် တဒိန်ရွာ၌နေစဉ်အတွင်း ဒေသအတွင်းမွန်ပြည်သစ်ပါတီ၏လှုပ်ရှားမှုများကို မျက်ခြေမပြတ်စောင့်ကြည့် နေသည်ဟုဆို၏။ ၄င်းစစ်ကြောင်း၏တာဝန်မှာ ချောင်းဆုံကျေးရွာမှ တောင်စွန်းကျေးရွာအထိ စစ်ဆင်ရေးဧရိယာ ဂွင်တွင် လှုပ်ရှားရမည်ဖြစ်သော်လည်း ယခုလိုတနေရာတည်း၌ အခြေပြုနေခြင်းသည် ထူးခြားမှုတခုဖြစ်သည်ဟု ဆိုသည်။ အဆိုပါရွာတွင်နေစဉ်အတွင်း ရွာသားများ၏ပစ္စည်းများကို တပ်သားများမှ ခိုးဝှက်နေကြောင်း ဒေသခံရွာ သားတစ်ဦးမှ အခုလိုပြောပါသည်။
 
ဒီစစ်သားတွေကတရားလွန်တယ်ဗျာ။ ဒါးတို့ပုဆိန်တို့ကအစခိုးတယ်။ ပြီးတော့မွေးထားတဲ့ ကြက်တွေ ဘဲတွေလဲခိုးတယ်။ ကြက်တွေဆိုယင် ခြုံကွယ်တာနဲ့ပျောက်သွားတာဘဲ။ ညညဆိုအရမ်းသတိထားနေ ရတယ်။ စိတ်ချလက်ချမအိပ်ရတော့ဘူး။
         
နအဖတပ်များ တဒိန်ရွာတွင် စခမ်းချနေစဉ်အတွင်း ဒေသခံရွာသူများအပေါ် ထိကပါးရိကပါး ပြုမူနေသည့်သတင်း ပေါ်လာသောကြောင့် ထိုင်းနိုင်ငံတွင် အလုပ်လုပ်နေသည့် အမျိုးသားများမှာ မိမိတို့၏ မိသားစုအန္တရာယ်အတွက် စိုးရိမ်ကာ ရွာသို့ပြန်လာခဲ့ရသည်ဟု ရွာသားမင်းဗလိုင်မွန်မှ ယခုလိုပြောပါသည်။
         
သူတို့ကစည်းစောင့်တဲ့သူတွေမဟုတ်ဘူး။ ကိုယ်မရှိယင်ကိုယ့်မိန်းမကနေ သူ့မိန်းမဖြစ်သွားနိုင်တယ်။ မိန်းမနဲ့ပက်သက်ပြီးတော့ သူတို့အရေးယူတာမရှိဘူး။ ကြုံရာမှာတပွဲတိုးယူအချိန်ကျလို့ တပ်ရင်းကို ပြန်ယင် ဒီအတိုင်းဘဲပစ်ထားတယ်။ ကျွန်တော်တို့အယင်နေတဲ့ရွာတွေမှာတွေ့ဘူးတယ်။
         
ထို့အပြင် မွန်ပြည်သစ်ပါတီ၏ နယ်မြေဒေသအုပ်ချုပ်ရေးအခြေအနေများ ပျက်ပြားအောင်အဖွဲ့ အစည်းများ၏ ဖွဲ့စည်းပုံများကို စုံစမ်းပြီး ကျေးရွာအုပ်ချုပ်ရေးအဖွဲ့ဝင်များအပေါ် ဖိအားပေးဆောင်ရွက်နေကြောင်း ပါတီဝင်တစ်ဦး မှပြောပါသည်။
         
ပြီးခဲ့သည့်ဇန္နာဝါရီဒုတိယအပါတ်လောက်တွင် မွန်ပြည်သစ်ပါတီ၏ ဗဟိုဌာနချုပ်အနီးဝန်းကျင်ရှိ သုဝဏ္ဏဘုမ္မိရွာကို တနသာင်္ရီတိုင်းရေဖြူမြို့နယ်အခြေစိုက်  ခမရ(၂၈၂)မှ ကျူးကျော်ဝင်ရောက်လာခဲ့ပါသည်။ ယခင်ကမွန်ပြည်သစ် ဌာနဝန်းကျင်တွင် မလာဘူးသည့်အတွက် ယခုလိုနအဖတပ်ဖွဲ့များ ဝင်ရောက်လာခြင်းသည် စစ်ရေးအရထူးခြား မှုတခုဖြစ်နေသည်ဟု မွန်ပြည်သစ်ပါတီအလယ်အလတ်ခေါင်းဆောင်တစ်ဦးမှ ဆိုပါသည်။

ယခုလို မွန်ပြည်သစ်ပါတီနယ်မြေအတွင်း နအဖစစ်တပ်များ ကျူးကျော်ဝင်ရောက်လာခြင်းသည်  မွန်ပြည်သစ်ပါတီ ကို စိတ်မချရသည့် အပစ်ရပ်အဖွဲ့အဖြစ် သဘောထားနေသည်ဖြစ်နိုင်ကြောင်း မွန်စစ်ရေးအကဲခတ်သူများမှ ဆိုပါ သည်။