မင်းထက်အောင်(ဇန်နဝါရီ- ၂၂)။    ။ နေရပ်သို့ပြန်သည့် ထိုင်းနိုင်ငံရောက်ရွေ့ပြောင်းအလုပ်သမား ၂၇ ဦးကို တင်ဆောင်လာသည့်ကားတစ်စီး ယမန်နေ့နံနက်စောစောပိုင်းက စံခလပူရီမြို့အနီး တောင်ခြေ၌တိမ်းမှောက်ခဲ့ရာ အားလုံးကိုဆေးရုံသို့ ပို့ဆောင်သွားသည်ကို မြင်တွေ့ခဲ့ရသည်။

၎င်းအဖြစ်အပျက်တွင် လူအသေအပျောက်များ မဖြစ်ပေါ်ခဲ့သော်လည်း စံခလပူရီဆေးရုံ၌ အတွင်းလူနာအဖြစ် ၇ ဦးတက်ရောက်ကုသခံရသည်ကို တွေ့ရှိခဲ့ရသည်။ ထိုင်းလဝကတစ်ဦးလည်း အထုပ်အပိုးများနှင့်ပိမိခဲ့သောကြောင့် ဒဏ်ရာအပြင်းထန်ဆုံးဖြစ်သည်ဟု သိရသည်။ သို့သော် အသက်အန္တရယ် စိုးရိမ်ဖွယ်မရှိဟု ဆေးဝန်ထမ်းများ ပြောကြားခဲ့သည်။

အဆိုပါဖြစ်ရပ်တွင် မိန်းခလေးများနှင့် ငါးနှစ်ဝန်းကျင်ခလေးအချို့လည်းပါဝင်သည်ကို တွေ့ရှိခဲ့ရပြီး အတွင်းလူနာအဖြစ်ကုသခြင်းမခံရသူများကို ဘုရားသုံးဆူနယ်စပ်အထိ ထိုင်းအာဏာပိုင်တို့ ဆက်လက်ပို့ဆောင်လိုက်သည်ဟု သိရသည်။

အများစုမှာ ထိုင်းနိုင်ငံတောင်ပိုင်း ချွန်ဖွန်မြို့နယ်မှ တံငါလုပ်သားမိသားစုများဖြစ်ကြကာ နေရပ်ပြန်ရန် ထိုင်းလဝကတို့အား တစ်ဦးလျှင် ထောက်ခံစာအပါအဝင် ပို့ဆောင်ခအတွက် ထိုင်းဘတ်ငွေလေးထောင့်ငါးရာ ပေးဆောင်ခဲ့ရသည်ဟု လိုက်ပါခဲ့သူ သံဖြူဇရပ်မြို့နယ်၊ ဝဲကလောင်းရွာသားတစ်ဦးက ပြောပြပါသည်။
သူ့အပြောအရ “တောင်ပေါ်အတက်လမ်းတစ်ဝက်မှာ ဒရိုင်ဘာဂီယာထပ်ချိန်းတာမဝင်လို့ နောက်ပြန်ဆုတ်ပြီး ကျသွားတာပါ” ဟု သိရသည်။

ယင်းဆယ်ဘီးကား ဒရိုင်ဘာဖြစ်သူကို စံခလပူရီရဲစခန်းသို့ ထိုင်းရဲများဖမ်းဆီး ခေါ်ဆောင်သွားသည်။
မျက်မြင်များအဆိုအရ ယခုအခေါက်တွင် နေရပ်ပြန်မည့်သူများအား ပို့ဆောင်ပေးခဲ့သည့် ကားသုံးစီးထက်မနည်း ယမန်နေ့မနက်တွင် မြင်တွေ့ခဲ့ကြသည်။
ယင်းအလုပ်သမား အများစုမှာ မွန်ပြည်နယ်ဖက်သို့ နေရပ်ပြန်ကြသည့် မွန်များဖြစ်ကြသည်။